- اهناک مهناک ، اکش فرد وزیر ، عند وَلَد . الولد اهوایه ابوه إِیحبه ، والولد عنده فَرَص یَطعَّمهَا حلیب و طِبیخ و مِتقَیَّد علیها ، و کل یوم یِخسِل إلها بصابون ، و هی الفرص اتاری بنت چان و من یخش الحوش تگَم تبَصبّص و یجی یَمهَا ویگَعد .

 (اخر اهوایه ایحبها) . والولد گَاعد بالملا فرد یوم أم الولد گَامت إِتوَجِعت . عگَب جم یوم توَفَّت لرَحمة الله . گَام الولد یبچی علیها وچان یجی یصیر سنه ، گَام أبوه یردی یتزوج ، و گَام یخطب . و چان یتزوج بفرد مَرَه ، های المره گَامت تموت من الولد و من الفَرَص مَالت الولد ، چیف یطعمها حلیب و تِمَن .

 فرد یوم گَالت إلاّ أَرید أسَّم الولد ، و أکتل الفرص . های همین حَطَّت بالعشا مال الولد سِم هذا همین من جا صاحت . له الفرص گَالت له تَرَه خالَّتلَک بالأکل سم ، هذا هم جا و چان تگَله : گَوم أکُل . گَلها: ما یِعجبنی . من گُلها ما یعجبنی عُرفَت گلتله الفَرَص و ، هذه همین گَالت راح أخلی لَه بالخبز و همین الفرص گلتله وچان تخلی له بالهدوم حتی من یلبسها تگَصَگَِصَه گَامت الفرص و گلتله .

 گَامت و چان تگَول های إِشلون آنی بالفرص إشلون أکتلها ؟ گَالت آنی أَسوی فرد شی واکتلها گَامت و چان تروح علی فرد حکیم ، گَالت له هاک های عشرین لیره وانی أَوَجِع نفسی هَسَّ یجی علیک رَجلی من تجی أتخُمنِی گَول ما یصلَح إِلها دُوَه الا الفرص الذی عندکم ، خلی تاکل من لحمها هَسَّه إِتطیب . گَلها میخالف . هاذی همین إِشتِرَت بفرد فِلسین. ....

کُرکُم و حَطَّتَه بوجهها و جابت خَبز إِرگَاک و جان تخلیه بین الفراش ، و چان تسوی نفسها وَجعَانَه . و گَامت إِتوِن جا علیها رجلها گَلها إفلانه إِشبِیج ؟ گَالت له وجعانه ، های ما تِندَار علی صَفحتَها یِطَگطِک الخبز الرگَاکَ هذا رجلها من یسمع یِتخَبَّل یگَلها إِفلانه إِشبیج ؟ تگُلَه إِلحک جیب لی الحکیم گَبل ما أَموت . هذا هم راح  علی الحکیم .

هو جا گَله گَوم مرتی وجعانه گَله میخالف . و چان یجیبه ویشوفها ، من شَافها ، گَله هاذی دُوَاها تِذبَحون الفرص الذی عندکم هو مِن سِمَع رجلها گَال إی هَای سَهلَه آنی هسه یجی من الملا محمد واقنعه بلَیره واخلَی یذبحها . و چان یطلع الحکیم .

 صار دنیا وکت العصر جا الولد من الملا ، وچان یگَله أبوه ، هذا الولد من سمع گَام یِلطُم ویبچی و چان یجی علیها ویبَّوَّس بیها ویگَلها اشلون یریدون یِذبَحوچ ؟ گَامت گَالت له انت گَلُه لَبُوک یَابَه أَرید أطلع علیها بالچول عگَب  ما أَتوَنُّس علیها أجی عود إِذبحها. انت من ترکبنی آنی أنهزم بیک .

هذا همین جا  علی ابوه و گَله بالحچایه . گَام ابوه گَله میخالف و چان الولد یِشِد علیها ، هو طلع بنص الچول ، وچان یِنهِزم . و گَامن ترکض الفرص گَع اتشیله و گُع اتحطه ، عَلما جت علی فرد إِولایه گَبُل ما یخش الولایه گَالت له : انی راح أروح ، هَاک هاذی سبع شَعرایات مِن یِضیمک الضیم انت إِعِلک شعره آنی اجیک .

 گَلها میخالف ، الولد عنده یجی عشرین لیره گَام یِخرِج بیها عگَب ما خَلَّص فلوسه گَام گَِعَد خِزمِچِی ببیت السلطان قابچی . هو الولد إِهوایه حلو، السلطان عنده ابنیه گَامت  البنیه شافته و عِشِگتَه و کل یوم إِتصیحه وتگَله (روح جیب) فلان شی .

هو همین یجیب إلها فرد یوم گَلتله انت متزوج ؟ گَلها : لَع . گَالت له تعال آنی آخذک . گُام یربّ الها . وهو همین گَام یحب إلها. فرد یوم جَتَّ علی ابوها ، گُالت له یَابَه هذا الولد القابچی ، هم ابن سلطان ، و انی أحبه و هو یحبنی و یعرف یِکتِب ، راح أتزوج بیه و انت خَلَّیه کاتب عندک .

 گَلها أشو روحی صِیحیه . گَامت البنیه ، و  صاحت له من جا گَام السلطان گَله انت إِبن مَن ؟ کَلَّه آنی ابن فلان وزیر . گَام و چان یعرفه من عرفه گام کتب خَط إلی ابوه صِدُک ابنک مهزوم منک ؟ وچان یبعثه إلی  أبوه بلَّیه حِسَّه .

جا جواب الخط ، إی یا أخی هذا ابنی و إِنهِزم منی ارجوک تبعثه . گام و چان یِقراه السلاطان ، و عرف گام و چان یسوی عرس ، و یگَطع مَهَر لبنته . و عگَب چم یوم داخلهم .

 فرد یوم الولد شِعَل من الشعرایات وِحدَه و چان تجی و تطلع الفرص گَالت له هَا ، بالخیر إِزواجک ، گَام و چان یجی علی السلطان عمه ، گَله یا عمی أَرید اروح علی ابویه ، وارید الوَطَن ، گَله میخالف گَام وشدلهم غَرَاض ، وإِنطاهم أکل و هو گَام ورکب الفرص و چان یمشون ویطبون و چان یجی علی بیتهم ویدکَ الباب وفَگولَه الباب و خش عگَب ما خش شاف مرت ابوه میته کَیَّف و چان یگَعد  هو و مرته وأبوه علی احسن حال چنه عندکم وجینه. 

 حکایات بغدادیات / حچایة بنت السلطان والخزمجی

حکایات بغدادیات/حجایه بنت الحطاب و السعلوة

حکایات بغدادیات 17/حجایة الدفنة من یموت المیت

الرجل الحامل/الحکایة الثامنة عشر

حکایات بغدادیات (الحلقة الأولى حکایة العبد أوف)

حکایات بغدادیات: (الحلقة الثالثة حکایة الچلب الاسود)

حکایات بغدادیات (الحکایة الرابعة؛بنت السلطان والدیو)

حکایات بغدادیات:الحلقة الثانیة (حکایة عشق البیض)

حکایات بغدادیات/ حکایة ابن الوزیر و بنت سلطان الجان

العجوزتین و ابن السلطان/ الحکایة السابعة عشر