- اهناک مهناک ، اکو فرد وزیر عنده فرد ولد . هذاک الولد عنده رَبْع إِهْوایه و فاسدین کلهم ، کل یوم یِگْضوه بالکیف والْوِنْسَهْ و ینطیهم من فلوس أبوه أصْرَامی ، کلهم صاروا زَنْگَینین و فَتْحولهم تِکَاکین و نَاس بْسوک هَرَج ( وناس بغیر سوک ) فرد یوم أبوه تْوَجَّع و چان یموت ، عگَب مامات گَام الولد یثرف الفلوس بالعِشَر ........وِیّه صِدْگَانَه . فرد یوم اُمه من قهرها گَالت هیچ و ماتت .
عگَب ماماتت امه ، یجی بعشرین یوم گَام هِلَک الولد ، و اصداقائه من شافوه هَلْکَان ، إِنْهِزموا منه ما گاموا یمشون ویَّاه صار ثانی یوم الولد ما عنده ولا قِرِشْ و لا پَارَه . گَام جا علی رَبْعَه گَلْلهم إِنطونی فرد چَمْ قِرِش ، گَالوله فُوت فُوت ، إِحْنا إِمنین ننطیک .
هو هم گَام باع غَرَاض الحوش و گَام یاکل بیها ، یجی شهر و چان یخلصها . و چان یگَوم و یبیع الحوش و یاکل بفلوس الحوش یجی شهر و خَلَّصها . صار ثانی یوم بات بالْگَهْوَه صبح من الصبح هلکان فلوس تْوْتُن ما عِنده ویرید یِتْغَدَّه هم ما عنده إِفلوس . گَام من قَهْرَه و چان یجی یَمّ گَبُر اُمَه و ابوه بنص الچول وچان ینام من نام جَتَّ الشمس علیه و هو ابن وزیر ، صورته حلوه و چان إِتصیر إِخدوده مثل التفاح هو نایم و چان تفوت فَردْ خَانُم ووِیَّاهَا عَبْده و چان الخانم إِتشوفه وچان تِعِشْکَه.
و گَلَّتْلِهَا للعبده تَعَایْ گَعْدیه و گَام ............. گَعَد گَالت له الخانم : لیش هِیچ إِهْنایه نایم ؟ گَلها والله الدَهَر خان بی . گَالت له ما عندک فلوس و جوعان ؟ گَلها إِی والله . گَامت گَالت له : تعال ویایه . چان یجی ویاها ، من جا ویایها خَشَّشَتَه بالحوش جابت له فْرَاش فُرْشَت له جابت له قاط إِهدوم لَبَّستهیَّا و جابت له غدَه و غَدَته و گَامت گَالت له یَلَّه دَنِلعَب گَام لِعْبوا ، وچان یاخذ و جهها و چان تگَله : دِروح ، وباچر تعال ، وإِنطته فلوس . اثاری های الخانم مرت فَرِد صدیق من أصدقائه اللذین اخذوا منه الفلوس و هو مایدری و چان یجی علی رجلها و سَلَّم علیه .
من سلم هذا باوع شاف لابس الزبون مَالَه تْعَجَب ، گَلَّه: فلان هذا إِمنین لک هالِهْدوم و هَلْ خَرْجِیَّه؟ گَله یا أَخی دأ أَحجیلَک آنا من قهری و من إِفلاسی جیت نِمِت بالِگْبور . أَشو انی نایم و جت علیَّ خانم هیچی حَلاتْها هیچی صِفاتْها و اخذتنی لْحُوشها و إِنطتنی فلوس إِهدوم گَله صدک ؟ هذا رِفیِجَه عِرَف های مرته ، و چان یِنْقهِر ، گَله : ما گَلَّتْلَک بَاچِر تعال؟ گَله بلی. گَالت لی باچر تعال و کت الظهر . صار ثانی یوم و چان یِطْلَع رجلها و جا هذاک و تغَدَّه و خَلَّص و گَاعد (.......) ، أول مرَّه و ثانی مره ، و چان یجی رجلها . هو جا رجلها گامت ضَمَّتَه بالصندوک .
هذا هم جا رجلها دَوَّر شاف مَاکُش و چان یطلع من طِلَع گامت طَلَّعَته و خَلَّصوا شُغُلهُم گَامت نِطتَه فلوس و لَبَّسَته غیر قاط إِهدوم ، و چان یطلع و یجی علی إِرفیجه هذا إِرفیجه، شاف إِزبونه الآخر . تعجب و چان یگله الیوم رِحت ؟ گَله إِی . عگَب ما تغدینا و خلصنا (.....) و چان یجی رجلها و چان تگوم و تْضُمنی بْبَطِن الصندوک .
گَله ضمتک ببطن الصندوک ؟ گَله أی . گَله هم گَلتلک باچر تعال ؟ گَله إِی . گَله : إِشوکت گَالت لک ؟ گَله وکت الظهر . هذا رجلها رَادَت إِتطُک روحه من قهره .
صار ثانی یوم و صار وکت الظهر و چان یخش گَامت طلعت له أَکِل و أکَل و خلَّص و گام (........) أول مره ، و چان یجی رجلها گَامت و چان تضمه بْبَطن الحصیره . هو رجلها فرد راس خَش وبیده ( روزج وَراوِر ) و چان یضربها بالصندوک و چان مرته تگَله (لیش ؟ شنو انت ) إِنجَنیت إتْخَبَلت ؟ و هو کَشَّف الصندوک شَاف ماکش و هو من شاف ماکش أَحد گَام و چان یِطْلَع من قَهَرَه هی هم گَامت و چان إِتْطَلَّع رفیجها من بطن الحصیره وگامت لَبَّسَته إِهدوم و انطته خَرْجییَّه ، و چان یگَضون شغلهم .
و چان تگَله باچر تعال . و هو طلع و چان یجی علی إرفیجه و هذا إِرفیجه شافه لابس غیر قاط من اهدومه . تِعَجَّب گَله هالیوم هَمْ رِحِت ؟ گَله إی والله . آنی (....) و چان یجی رجلها من تتجا رجلها " ضمتنی بالحصیره ، و هذا رجلها خش بیده زوج وراور و ان یضرب الصندوک و هو کشف الصندوک شاف ماکو شی و چان یطلع .
و بعدین انی خلصت شغلی ویاها . گَله هم گَلت لک باچر تعال گَله أی هذا هم صار ثانی یوم راح وکت الظهر طلعت له اکل أکل و خلص و گَام یتونس ویاها و هم بها الحاله و چان یجی رجلها، حارت وین تضم رفیجها " عندهم حوض (مال مای) گَامت وضَمَّته بحوض المای و طَلَّعَتْ فرد راسه ،و خَلَّت راسه شِجَرَه ، و طلعت منها إِعیون و حَلِک و عَلَّمَته گلتله هسه إِنگَوم نِلْعَب لمن یذب علیک انت گَول هیچی راسک ، لا تخلیه یضربک ، و من آنا أضربک لا تگَول هیج. و چان إِتفُک لَه الباب هذا خش اول ما خش و بیده چِنتِیَانَه و چان یجی علی هذیج الحصیره و یضربها من ضِربَها گِسَمْها نُصین .
و چان تگَله لیش یا ابن عمی گَصیت الحصیره ؟ هذا من قهره گَلها جَرَّبت بیها هالچنتیانه و چان یگوم یدَوَّر بکل الحوش مالِگَه و هی إِتباوع و چان الله یِعِلْمَه و چان یجی علی الشجره بنص الحوش گَلها های شنو ؟ گَالت له تعال ، های أنا حطیتها ، أَشو انتَ کلما تجی مثل النار یوم تضرب الصندوک و یوم ضربت الحصیر اشو انت شِعْرفِتْنی و آنی من شفت هیجی انتَ ، خلیت هالشجره ، تعال اذا انت إِضربتها بنوایَه و صَحَّتع بیها انت إِتطلعنی و طْرُدْنی بس تْهَای الآهْدُوم انچان انی ضربتها و صحت بیها آنی أَطُرْدک و ما أَنطیک کل شی بس های أَهدومک .
گَله میخالف هو أَوَل ما لِزَم إِنْوَایَه و چان یضربه هو ضربها صحت بالشجره گَالت له : گَوم گَوَّاد ، دِیه إِطْلَع . گَامت و چان تِطُرْدَه و جا من قهره بالُتکَان . و چان تگَوم و تْطَلَّع رِفیجها من الحوض و لَبَّسشتَه إِهدوم زینه و چان یطلع گَالت له : باچر تعال من وکت الصبح ، گَلها أی ، هذا هَم و چان یجی علی إرفیجه ، گَله " هالیوم هم رحت ؟ گَله إِی .
و آنی (..........) و چان یجی رجلها و گَامت ضمتنی بالحوض و حَطَّت براسی شجره و گَاموا تْراهْنَوا بَینَاتهم الرجّال والمره گَالوا کِلْمَن إِینُوش و یصح بالشجره یاخذ کل الحوش والغَرَاض هذا هم رجلها إِضْرَبنی آنا اُگَْفَیت ما صحت بیّ . و چان تِضْرُبنی مَرْتَه و صحت بیْ و گَامت طلعته ، هذا هم من قهره گَام عَزَّل وجا علی أَهلها و حچالهم بالجچایة من الأول إلی التالی ، و گَلهم إذا ما تْصَدگَون ...........إِنتوا إِعِزْمَوا الولد و خَلَّی یحْچِیلکُمْیَاهَا الحچایه .
گَالوا میخالف گَموا رَکَّبوا إِطْبیخ و جو علی الولد عِزْمَوه مِنْ عزموه گَامت ام البنیه عِزْمتها هاغیی البنیه عُرْفَتْ گَامت و چان إِتجیب ویاها البَزونَة هذا هو گَاعد إِرفیجها و چان إِتْذِب لَه البزون ، و چان ارفیجها یعرف هذوله أَهلها ، ئ هذا رَجلها ، گَاموا و گَالوله : بَلَّه أَشو إِحچی لنا مَسْأَلَة های إِرفیجتک الذی إتحبک .
گَلهم میخالف أَحچیلکم من الأول ، فرد یوم آنی إِهْلَکِتْ آنی مِنْ هِلَکِتْ جیت انام من قهری علی الکَبور ، من نِمت عگَب مشوار جت علیّ فرد بنت إِشْحِلْوه گَالت لی انتَ إِشْبیک ترید افلوس ؟ گَلت لها :أی والله ، ها ذی هم جابتنی علی حوشها و گَعَّدَتْنی و جابت لی تأکل عگب ما ما أکلت گَمت إِگَْضیت ویاها شغل .
و چنت أَطلع و گَلت لی تعال باچر ، صار ثانی یوم جیت و هم إِتغدیت و هَسْتَوْنی گَا اگَضی ویاها شغل و چان یجی رچلها و گَامت ضمتنی بالصندوک گَام دَوَّر ما لِگَه شی گَام و طِلَع و گَامت طلعتنی من الصندوک ولبستنی غیر إِهدوم و گَالت لی باچر تعال آنی صار ثانی یوم و جیت و کت الظهر وهم تغدیت و خَلَّصِت ْ و هَسْتَوْنی دا اگَضی ویاها الشغل ، و چان یجی رجلها و گَامت ضمتنی بالحصیر،ومن خَش رجلها اول ما خش جا علی الصندوک و ضربه بالْوَرْوَرْ و کِسَرَه و شاف ماکش .
صار ثانی یوم چان آجی آنی هسه گَا اشتغل ویاها و چانی یجی رجلها و هو جا رجلها و چان إِتگَوم و تْضُمنی بَّطن حوض و گَامت لبستنی شجره و هو خش رجلها دَوَّر دَوَّر ما لِگَهَ شِی : گَام جا علی الشجره کل یوم شنو شایف علیّه فرد شی ؟ تعال دَنِتْرَاهَن و نجیب نِوَه و نضربه لْهل شِجْرَه إِنْچَان انتَ صحت بیها انت إِطردنی و أخُذْ کل الحوش .
انچان انی صحت بیها أَطُرْدَک . هاذا هو کَیضربها و چنت أَفَّز من النوم ما شفت روحی الا بنص الچول . های أخوتها و اهلها گَالولَه : بَسْ های مَنَام ؟؟ گَلهم إِی بس شنو؟ انا غیر شِفِتْ منام .
و چان یگَلوله لرجلها بس گَواد جَایْ تِکْسِر عَرِضْنَا گَاموا علیه و چان یِگََصَّبِوه وِصْلَه وِصْلَه . و گَاموا گَلولَه للولد تعال ، انت إِتریدها للبنیة ؟ گَلهم إی گَامت البنیة گَلتهم آنی هم أریده گَموا و گَطعولهم مهر و گَعدوا علی احسن حال و گَام الولد أَخَذ تِجَاره و گَام إِیبیع و چان إِیصیر فَرِد زَنْگین (رد علی الاول ) من چان ابن وزیر و گام بِنَالَه قَصُر و گَعدوا بیه مکیفین چنه عندکم و جینه .
الرجل الحامل/الحکایة الثامنة عشر
العجوزتین و ابن السلطان/ الحکایة السابعة عشر
حکایات بغدادیات/ حکایة ابن الوزیر و بنت سلطان الجان
الحکایة الرابعة عشرة \حچایة بنت اللگلگ
حکایات بغدادیات/ الحکایة الثالثة عشرة حچایة بنت القاضی
حکایات بغدادیات/ الحکایة الثانیة عشرة :حچایة مره الشواک المخبلة
حکایات بغدادیات/ الحکایة الحادیة عشر:حچایة بنت السلطان
حکایات بغدادیات \ الحکایة العاشرة ؛الدرویش وابن السلطان
الحکایة التاسعة\ الولد الاربع تشبار والاربعین دیو
الحکایة الثامنة\حکایة المریّة وطیر السعد
الحکایة السابعة(بنت السلطان والبغونچی الاگرع)
حکایات بغدادیات الحکایة السادسة\حکایة بنت الخیاط
حکایات بغدادیات/ الحکایة الخامسة؛حکایة اطباشی ذهب